Saioa Artesiagatik. 360º eta Errealitate Birtualean+ info anitz

Baztango mendien artean, garaiena dugu Saioa. Bere gailur belartsuak eskaintzen duen ikuspegia paregabea da, iparraldeko haranetatik Moncayora eta Kantauri itsasotik, Pirinioetara, baldin eta lainorik ez badago.

Bertara igotzeko ohiko bideak bi dira, Belateko gainatik abiatuta, Azkenazko lepotik igaro eta Okolin gaina atzean utzita, alde batetik, eta aurkako isurialdean, Artesiagan hasita, Sagardegiko lepotik doan bidetik.

Bertara iristen diren bide arruntena ez bada ere, gaurkoan Artesiagatik abiatzen den bat burutuko dugu, zuzenagoa den Zirolako Harriaren ondoko bidetik. Eremu lainotsu honetan hodeiarteak probesteko biderik egokiena da, laburrena eta agerikoena izanagatik.

Bide hauek errazak eta erosoak dira, edozein adineko mendizaleek ibiltzeko modukoak. Neguan ere, mendiko eskiekin gabiltzanon artean ere klasikoetako bat dugu Saioa.

Aipatutakoak aintzat hartuta, erraz ulertu daiteke zergatik Saioa mendia den Nafarroako tontorren artean maitatu eta bisitatuenetakoa.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

Artesiaga-Zirolako Harria

PISTATIK PASEOAN

Artesiagako lepotik abiatuta, HM norabidera abiatzen den pistan barneratzen gara, eskuin aldean dugun Eurtegi mendiaren hego-mazela inguratuz. Bidea basoaren goiko mugaren gainetik doa malda gutxiko aldapatik.

Metro gutxitan, bideak IM aldera bira bat egiten du Eurtegiko HM magala moztuz. Bertatik, Zirolako Harria aurrean ikusi dezakegu. Pistak ezker aldera bira egiten du, Eurtegi eta Saioaren arteko lepoaren azpitik eta HM norabidean metro gutxi batzuk egingo ditugu, seinale-tantaia duen bidegurutzera iritsi arte.

Bertan, eskuin aldeko pista hartu eta lehenengo bihurgunearen parean pistatik irteten gara Zirolako Harrirantz, IM norabidean, belarreko malda ertaineko aldapatik, seinale txuri eta gorriak jarraituz. Zirolako Harriaren ondoko lepora iritsi aurretik, ezker aldera egiten dugu, harkaitzen azaleratzearen artetik HM norabidean gora eginez.

Zirolako Harria-Saioa

HEGALETIK ZUZEN

Harrien gunea atzean utzi eta belarditik zuzen egiten dugu gora, lurrean sartutako markadun taketak jarraituz. Saioa mendiaren aurreko muinora gerturatu ahala, malda areagotu egiten da harkaitz-azaleratzea zeharkatu arte.

Muinoaren azkeneko aldapa berriro ere gogortu egiten da goialdera iritsi aurretik. Hala ere, zuzen jo beharrean, eskuin aldetik, zatirik gogorrena inguratzen dugu, errekaren sakonunetik gertu iraganez.

Goialdea atzean utzi eta Saioa mendiaren azkeneko aldapa aurrez-aurre ikusten dugu. Erreferentzia gisa, hegalaren erdian dagoen ageriko arrakala, eta gailurraren ezker aldean dagoen lepotxoa hartuta, tarteko eremuan egingo dugu igoera.

Tarte honetan, taketak desagertu egiten dira. Hala ere, nahiz eta ageriko biderik ez egon, edozein lekutik igotzeko aukera dago. Magala zabala da eta sigi-saga ibiltzeko arazorik ez da.

Goialdera iritsi aurretik, taketak berriro ere ageri dira, gailurretik gertu. Bizkarrean gaudela, ezker aldera egiten dugu, gailurretik aldentzen gaituzten azkeneko metroak burutzeko.