Val d’Aran bailarara gerturatzen den orok derrigorrez bisitatu beharreko hainbat txoko eskuragarri dauzka, hauen artean berezienetakoa, aspaldi hustutako Montgarri herrian dagoena izanik. Aurkeztutako ibilbideak bertatik igarotzen den Noguera Pallaresa errekaren lehen kilometroak jarraitzen ditu, larre eta mendi-pinudiak zeharkatzen dituzten bideak erabiliz, Santutegira eta berau osatzen duten bordetara iritsi arte.
Elurrik ez dagoenean, oinez edo bizikletan egiteko ibilbide ezin hobea dugu, bai lagun artean zein familian. Neguan ordea, mendi erraketa zein iraupen eskiekin egin izan ohi da. Nahi izan ezkero, motoeski edo txakur-leren bidezko txangoak antolatzen dituzten zerbitzuak ere aurkitu daitezke bailaran.
Ibilbideak errekaren bi aldeetatik doazen Camin Riauko pistak erabiltzen ditu, jaitsiera alde batetik eginez eta igoera bestetik. Oro har, ibilbide hau ordulariaren orratzen joera jarraitzen du, baina aurkakoan ere egiteko aukera izango da, betiere kontuan izanik eskuinaldeko bidean baimendutako ibilgailuak ere aurkitu daitezkeela. Galtzeko arriskurik ez dago, MTBrako homologatu eta seinaleztatua dagoen 20. bidea baita BTT Val d’Aran zentruan.
Ibilbide honetan oinezkoek izango dute beti lehentasuna, norabide batean zein bestean, hortaz, adi eta kontuz ibili beharko dugu bizikletaren gainean. Animalia anitz ere egon daitezke bidean zehar, beraz, hauek ere errespetatu beharko ditugu. Ordainean, bailaran aurkitu daitekeen ingurune idilikoenetako batetan murgiltzeko aukera izango dugu.
INFORMAZIO BALIOGARRIA
ZAILTASUNA ETA ARRISKU MAILA
Método de Información de Excursiones (MIDE)
MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.
Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).
Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.
IBILBIDEAREN DIAGRAMA
IBILBIDEAREN TRACK-A AZTERTU EZAZU
- Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
- Aukeratu track-eko edozein puntu mapan, eta diagraman proiektatuta ikusi ahal izango duzu.
- Egin klik erreferentzia-puntuen gainean, horiek ezagutzeko eta kanpoko mapa batean kokatzeko.
IBILBIDEAREN DESKRIBAPENA
JAITSIERA LILURAGARRIA
Ibilbidea Beret eski pistaren aparkalekuaren atzealdean dagoen eraikuntza metalikoaren ondoan hasten da. Ezkerretara kokatzen den zubia igaro eta Camin Riauko pista hartzen dugu. Oinpekoei eragiten hasten gara eremu lau eta eroso batetik IE norabidean, Gessa Etxolaren azpitik eta erreka beti gure eskuinaldean utziz.
Parros Basoaren inguruan bideak beherakoa hasten du emeki, Tuc de Pedescauc mendiaren oina iparrerantz inguratzen duen heinean. Arriu de Parros eta goitik dagoen Cabaña de Parros etxolara iristean, mendiaren oina inguratzeari uzten diogu. Bat-batean ekialderantz eginez, Tuc de Parros mendiaren oinaren bukaeran sartzen gara. Gune honetan, aldapa areagotzen da eta ibiltari edo animaliarik ez badago, jaitsiera azkar eta polit bat egiteko aukera izango dugu. Berriro ere iparrerantz jotzen dugunean, eskuinera egiten duen bihurgune itxi batetara iristen gara, Es de Cabau etxolaren azpitik igaroz.
Tuc des Bandolers mendiaren mazela zeharkatzen duen aldapa igo eta zuhaitzen artetik atera bezain laster, Montgarri herria kokatzen den lautadara iristen gara.
ITZALPEKO IGOERA
Santutegiaren aurrean dagoen zubia iragan eta errekaren eskuin aldetik behera doan bide nagusitik jarraitzen dugu, kilometro baten buruan goranzko bidearekin konektatzen duen bidegurutzea topatu arte. Honek jada 180 graduko bihurgunea egiten du.
Pistatik gora egiten dugu HHM norabidean, Bosc des Dossau basoa zeharkatuz. Malda nahiko jarraitua da baina bizikletaren gainean ibiltzeko erosoa izaten jarraitzen du. Goragune bat eskuinean utzi ondoren, bideak hegoalderantz egiten du, malda gutxituz, tarte txiki batean behintzat. HHM norabidean gorantz jarraitzen dugu Barranc de Laveja sakanera iritsi arte. Bideak HMrantz egin eta jaitsiera labur bat egiten dugu. Iturria eremu honetan aurkitu dezakegu, bidea eta errekaren artean.
Bonavé bidean gora jarraitzen dugu, Montanha deth Dossau mendiaren oina zeharkatuz basoaren bukaerarantz, bidea ixten duen ate metaliko batetara iritsi arte. Hau bizikletatik jaitsi gabe, eskuinaldetik gurutzatu ahal izango dugu.
Hemendik aurrera, Maladetako eremua begien aurrean izanik, zeharka-meharka ibili ondoren Beret estazioaren aparkalekura bueltatzen gara.
BERET – MONTGARRI – BERET 360º ETA EB-N
Pantaila osoa aktibatu ezazu kontrol-panela erabiliz
- Norabide-geziak pantailan
- Mapa interaktiboa albo batean
- Ibilbidea ataletan zatikatua, goiko menua erabiliz
Ikuspuntua aldatzeko, saguaren ezkerreko botoia sakatuta aldeetara edo gora zein behera mugitu ezazu
Hurrengo edo aurreko argazkira joateko nabigazio duala: norabide-gezien edo aurreko eta hurrengo irudi-markatzaile mugikorren bidez
BIBAKA
Gaua emateko babestutako guneakEz daude
ATERPEAK
Jateko eta lo egiteko gaitutako eraikinakRefugi de Peira Arroja (Aterpe librea). Beret aparkalekura iritsi aurretik, eta Amics de Montgarri, Montgarri herrian bertan
URA
Edateko urez hornitzeko lekuakInguruko ibaiak eta errekak. Ibilbidetik gertu dagoen iturri bat dago. Estazioan ura hartu daiteke
ARRETA
Arrisku objektiboengatiko arreta bereziko eremuakUdaberrian litekeena da ibilbide osoa edo zati bat elurrarekin egotea
SEGURTASUNA
Errailak, ainguraketak eta gainerako segurtasun-elementuakEz daude
