GR11 35 etapa: Nuria-Vallter 2000 360º eta EBn

GR 11 Transpirenaika ibilbidearen 35. etapa: Nuria-Vallter 2000

Ibili beharreko distantzian dela esan genezake, Nuriako Santutegitik abiatu eta Vallter 2000 inguruan bukatzen duen etapa hau. GR11 bidea egiteko laguntza talderik ez bada edota errepidearen ondoan bibaka egin nahi ez bada, errepidera iritsi aurretik Ulldeter aterpea leku paregabea izan daiteke etapa bukatzeko.

Ibilaldian, 2700mko garaiera gaindituko dugu eta Coll de Nou Creus eta Coll de Tirapits lepoen artean dagoen ertz ederretik ibiliko gara. Eremu horretan ezagunak diren Pics del Infern, Bastiments eta Gra de Fajol mendien ondotik ibiliko gara, Vallter 2000 eski estazioko pisten eremuan sartu eta etapari bukaera eman aurretik.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Nuria-Coll de Nou Creus

GOI-EREMUETARA ITZULIZ

Nuriako santutegiko atzealdetik abiatzen gara, hain zuzen ere IE aldean. IE norabidean abiatzen den pista hartu eta aurrera egiten dugu elur artifiziala osatzeko erabiltzen diren zurtoinen artetik, azkeneko eraikuntza atzean uzten dugun arte. Zubira iritsi eta zeharkatu gabe errekaren ondoan jarraitzen dugu hurrengo zubira iritsi arte.

Errekaren beste aldera egin eta ekialdetik gorantz egiten duen pistan sartzen gara. Bihurgunera iritsi, eta norabidea aldatu gabe, aurrera jarraitzen duen mendi-bidean sartzen gara. Aurrerago, bideak berriro ere pistarekin bat egiten du eta bertatik jarraitzen dugu eskuin aldera guztiz egiten duen bihurgune batera iritsi arte. Aurrekoan bezala, norabiderik aldatu gabe, aurrera jarraitzen duen mendi bidetik jarraitzen dugu eta ubidea ezker aldean dugula gutxika metroak irabazten dizkiogu mendiari.

Egurrezko zubi bat medio, errekaren beste aldera jo eta Pic de Noucreus mendiaren HM kontrahormaren oinaren ondotik bira luze bat abiatzen digu, Iparrerantz hasi eta ekialderantz. Iparrorratzak ekialdea jo aurretik, bira luze bat egiten dugu IE aldera eta Coma de Nouscreus aldetik zirkua ixten duen hegalera abiatzen gara.

MALDAK GORANTZ EGITEN DUTEN GUNEA

Conca de le Mulleresera iritsi eta ubidearen ezker aldetik jarraitzen dugu ubidea bera desagertzen den arte. Jarraian, lepoan bukatzen duen malda handiko hegala EHE moztuz metro batzuk kentzen dizkiogu. Lehenengo muinoa gainditu eta ekialdetik IE aldera luzatzen den arku bat eginez bukaerarako arrapalaren aurrean kokatzen gara.

Malda areagotu egiten da nabarmenki eta HE aldera jotzen dugu diagonal bat eginez, jarraian, sigi-saga txiki batek Serrat del Mig gandorraren goialdera gerturatzen gaitu eta haren goiko hormaren azpitik leporantz emeki egiten dugu gora ipar norabidean. Horma lausotzen denean, bira batek gandorraren goialdera eramaten gaitu bertatik metro gutxi batzuk eginez. Bideak ebakitik metro batzuk urruntzen gaitu lepora iritsi arte.

Coll de Nou Creus-Coll de Titapits

2700MTIK GORAGOKO ERTZETAN

Isurialdea aldatu eta IE aldera bideratzen ditugu urratsak, eskuin aldean Pic de la Fossa del Gegant dugula. Gailurra inguratu eta ertzera berriro iristean, ekialderantz jaisten hasten gara Coll de Carança leporantz.

Lepoan dagoen bidegurutzean, zuzen jarraitzen dugu EHE aldera ertzetik igoz. Bidegurutzetik 250m inguru ibili ditugunean, bideak isurialdea aldatu eta Pic inferior de la Vaca tontorraren aurretik dagoen pasarte malkartsu bat ekiditeko.

Pasartearen azpitik itzulinguru txiki bat egin eta berriro gandorrera igotzen gara. Gailurraren azpitik igaro ostean, Coll de la Vaca lepora jaisten gara.

Lepoan dagoen bidegurutzean, ageriko bidea hautatu eta Pic superior de la Vaca mendiaren tontorraren azpitik igarotzen gara, hegoaldeko isurialdean dagoen mendi-bidetik. Gailurra atzean utzi eta lurrezko mendi-bidean jarraitzen dugu Coll de Tirapits lepora iritsi arte.

Coll de Tirapits-Coll de la Marrana

HIRU HANDIREN AZPITIK

Lepoan berriro ere isurialdea aldatu eta aurrean Pic de Tirapits mendia dugula, EIE aldera jaisten hasten gara. Malda areagotu egiten da eta IM aldera bira egin ostean, Pic Superior de la Vaca eta Portell lepoaren arteko hegala mozten dugu diagonal luze bat eginez, Cabana de Tirapits etxolaren azpian kokatzen garen arte.

Bailara aldera bira egin eta ubidearen ezker aldetik doan bidetik metroak galtzen jarraitzen dugu hondora iritsiz. Aurrean eta erreferentzia gisa agerikoa dugu Gra de Fajol mendia, honen ezker aldean kokatzen baita Vallter ingurura iritsi baino lehen, zeharkatu behar dugun Coll de la Marrana lepoa.

Pic de l’Infern mendiaren bertikala atzean utzi eta Pic de Fresser menditik haratago doan laua zeharkatzen dugu, Fonts del Fresser erreka-gunera bira egin aurretik. Lehenengo ubidea zeharkatu eta iparrera bira egin ostean, berehala EIE aldera jotzen dugu beste bi zeharkatuz. Frese erreka nagusia aurrean izan arte beste bi ubideren gainetik igaro beharko dugu. Erreka nagusiak dakarren uraren arabera, bidetik beste aldera zeharkatzeko aukera izango dugu edo txarrenean, beherago bilatu beharko dugu leku aproposago bat.

Berriro bidean, Bastiments mendiaren hego isurialdea beherantz zeharkatzen duen Feixa Llarga izeneko zerrendaraino igotzen gara eta bertatik metro batzuk burutzen ditugu. Bastiments mendiaren hego isurialdeko hartxingadien mailara iristen garenean, bideak zerrenda utzi eta Coll de la Marrana leporantz igotzen jarraitzen du, EHEtik abiatu eta Ekialderantz bira bat medio.

Coll de la Marrana-Vallter 2000

AZKENEKO METROAK VALLTER ESKI-GUNETIK AT

Gra de Fajol eta Bastiments mendien artean gaudela, Gra de Fajol mendiaren ipar hegaletik behera jaisten hasten gara, oinerantz doan hartxingadiaren ondoan uzten gaituez zeta handi bat burutuz. Hartxingadiaren albotik beherago dagoen bidegurutzera iritsi eta eskuineko bidea hartzen dugu ipar oinetik EIE aldera eginez, zirkuaren sarrerara iritsi arte.

Sarrerako hegala, azpiko maila batean dagoen lau txiki bateraino amiltzen da eta bertan hesi sorta bat topatzen ditugu, itxitura bat eskuin aldean eta hurrengo maldatik zuzen jaisten den beste bat ezker aldetik.

Bi hesien artean zuzen jotzen dugu beherantz harrien artean, inguruko mendi-bide guztiak bat egiten duten puntura iritsi eta jarraian beherago dagoen belazera iritsiz. Pla de la Calma lauaren beste aldean, Refugi Ulldeter aterpera jaisten den azken aldapa dugu. Baldin eta errepidearen ondoan bibak bat egin nahi ez edo aparkalekuan autorik eduki ezean, etapari amaiera emateko leku aproposa deritzogu.

BERRIRO ERE ASFALTOA

Aterpean atsedenaldi bat egin eta tabernatik igaro ostean, bideari ekiten diogu aterpearen ekialdetik iparrerantz inguratu eta berehala basoan sartuz. Basoan, ekialderantz bira egin eta alde batetik bestera behera egiten dugu errekara iritsi arte.

Ubidearen beste aldera egin eta honen bidearen ondotik jarraitzen dugu eta gutxira IE aldera bira egiten dugu sakanaren gainetik jarraituz, basotik irten arte. Zuhaiztiak atzean uzten ditugu Pla de Racó soilgunean eta honen beste aldean Vallter 2000 estazioko errepidea dugu zain.

Asfaltoa zapaldu eta errepidean behera egiten dugu hurrengo bihurgunera iritsi arte, bertan dago eta hurrengo etapan asfaltotik urrunduko gaituen GR11 mendi-bidearen abiapuntua.