GR11 27 etapa: Tavascan-Àreu 360º eta EBn

GR 11 Transpirenaika ibilbidearen 27. etapa: Tavascan-Àreu

Tavascan-Àreu etapa ederra, azkar eta eroso ibiltzeko gaitasuna eskaintzen duten pista eta malda handiko kanaletatik zuzen doazen bideak bateratzen dituena dugu, gehienbat zuhaizti eta basoen artetik doana.

Metatutako desnibelari erreparatzen badiogu, ibili beharreko 18,8Kmtan ia 1400m igo beharko ditugu eta 1100mtara gerturatu ere jaisteko orduan, proposatutako ibilbidea osorik egiten bada. Àreu herrian bukatzekotan, aipatutakoari 3 Km inguru kendu beharko zaizkio eta 150m inguru goranzko desnibelean.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Tavascan-Boldís Sobirà

BASOKO BIDE MALKARTSUA

Tavascan herriko Monumento a la Aguadora monumentuaren ondotik abiatzen gara HE norabidean. Errepidearen beste aldera egin eta Turismo Bulegoaren ezker aldetik doan bidea hartzen dugu, errekara iritsi eta zubia medio, aurkako aldera eginez.

Boldís Sobirà herria jomuga, EIE norabidean gorantz egiten duen mendi-bidetik norabideari eusten diogu elektrizitate linearen azpitik igaro eta HHE norabidea hartuz, basoan barneratzen gara. Bertan metroak azkar irabazten ditugu, tarteka bidea harritsua bada ere, penditza gogorra baita, batez ere hasierako pasarteetan.

Soilgune bat igaro eta ekialderantz igotzen den sigi-saga batek harresi baten ondora eramaten gaitu, hemen zeta bat hasten dugu Les Planes izenarekin ezaguna den bizkar bat gainditzeko eta behin azpian utzita, berriro ere aurreko norabidea berreskuratzen dugu. Hegalean gora jarraitzen dugu seinale tantaia duen bidegurutze batekin topo egin arte. Eskuin aldera hasi bezain laster, estugune bat igaro behar dugu. Magalaren harkaitz plaka bat bidearen gainera etorri eta bi maila txiki sortzen ditu oztopo gisa. Hala ere, zailtasunik gabe igarotzen da kable bidezko eskudela lagungarri duen estugunea.

Hegala zeharkatzen jarraitzen dugu, Barranc de Les Planes sakanera iritsi arte, bidean gora eta behera eginez. Sakanera iritsitakoan, Turó de Santa Cilia mendiaren IM kontrahorma inguratzen hasten gara, bira luze bat eginez. Hurrengo kontrahormarekin gauza bera egin eta mendiaren HM isurialdea zeharkatzen bukatzen dugu. Seinale tantaia batek ekialderantz bideratzen gaitu, Boldís Jussà herriaren gainetik, garaiera mantenduz Boldís Sobirà herrira iritsi arte.

Boldís Sobirá-Coll de Tudela

KANAL ETA PISTEN ARTETIK

Kale nagusitik ekialderantz ibiliz, herria zeharkatu eta sarrerako aparkalekuaren eskuin aldean dagoen iturrira gerturatzen gara. Ura hartu eta bideari ekiten diogu.

Errepidetik metro gutxi batzuk burutu eta bihurgunearen erpinean hasten den basoko pista baliatuz, ekialderantz jotzen dugu. Ubidearen gainetik igaro eta pistak HHM norabidean egiten du goitik datorren pista batekin bat eginez. Bidegurutzetik 400m inguru ibili ditugunean, bidearen ezker aldean seinale tantaia batek pistatik irten eta ekialderantz doan mendi-bide batera eramaten gaitu. Mendi-bideak, Canal de Fontanilles kanaletik gora zuzen egiten du, 250m gorago berriro pistarekin bat egiten duen arte.

Pistan, ezker aldetik jarraitu eta zeta bat burutzen dugu, Punta de las Roquetes gaina inguratu ondoren, Pic de Tudela mendiaren mendebaldeko bizkarraren gainean kokatuz. Puntaren hego-isurialdean sartu bezain laster, pistaren ezker aldetik doan mendi-bidea hartzen dugu, pista bera eta basoaren mugaren artetik ekialderantz emeki gora eginez. Pistak ipar aldera egin eta gure bidetik urruntzen denean, aurrez aurre topatzen dugu.

Beste aldera egin eta zuhaitzen artetik irteten gara goialdeko basorantz doan diagonala hartzeko, HE norabiderantz bira bat burutuz. Zuhaitzen artean alde batera eta bestera egiten dugu, malda handituz doala eta bat batean, goialdeko laura iristen gara zuhaitzetatik at, Coll de Tudela lepoaren hegoaldean. Gure bidea eta goialdea zeharkatzen duenak bat egiten duten lekuan, ekialderantz bira egin eta lauaren ezker aldean dagoen lepo zabalera iristen gara.

Coll de Tudela-Puntanou

MONTEIXO AURREAN JAISTEN

Lepoa atzean utzi eta soilgunean behera hasten dugu jaitsiera, Monteixo mendian aurrean dugula, HHE norabidean. Bosc de Tudela basoan sartzen gara soilgunearen azpialdera iritsi aurretik eta hurrengo gandorrera iritsi arte norabideari eusten diogu.

Gandorrean HM norabidera bira egin eta kanalaren erdialderaino jotzen dugu. Azpian ubidea dugula, iparrera jo eta ibarra iparraldetik mugatzen duen maldara gerturatzen gara. Kanala bitan banatu eta hegoaldeko aldea, ubidea duena, sakanean amiltzen da, ondorioz, iparretik doa bidea.

Behin kanala bitan banatzen duen kontrahorma zeharkatu dugunean, bidea tentetu eta ekialderantz jaisten da, zuhaitzen artean alde batera eta bestera eginez, Bordas de Costuix etxolen ondoan, basoa atzean uzten duen arte.

Borden aurrean dagoen pistatik ezker aldera jotzen dugu. Metro gutxiren buruan, pistak IE aldera egiten du eta eskuin aldera, ekialderantz doan bihurgunearen erpinean, seinale tantaia batek bidegurutzea agerian uzten du. Zuzen doan mendi-bidea hartu eta pistaren bihurguneen arteko lasterbidea egiten du.

GR11 bidearen lasterbideak

Berriro pistara itzuli eta ondoko bihurgune estua burutzen dugu, ezker alderantz jaisten den beste lasterbide bat dagoela ohartu gabe. Bideari kilometro bat erantsi diogu ondorioz, hori bai, ibiltzeko oso erosoa den kilometroa, aipatzearren. Ubidea zeharkatu eta berehala hurrengo loturarekin egiten dugu topo, orain bai, argi seinaleztatuta tantaiaren bidez.

Pista bitan zeharkatzen dugu lasterbideak eginez eta azkenik, Força d’Àreu ingurura iristen gara, errepideraino jaitsiz.

Etapa amaitzeko bi aukera

Txangoari amaiera emateko bi modu daude hemendik aurrera. Eskuin aldera egin eta Àreu inguruan bukatu, edo ezkerrera jo eta Vall Ferrarako errepidean Puntanouko bidegurutzera arte igo, hurrengo etapari hiru kilometro kenduz.