GR11 10 etapa: Aguas Tuertas-Lizara 360º eta EBn

GR 11 Transpirenaika ibilbidearen 10. etapa: Aguas Tuertas-Lizara

Aguas Tuertas-Lizara ibilbidea, Aragoiko Pirinioetako bi bailara ederretarikoenetatik igarotzen da, meandro gorridun Aguas Tuertas bailara eta Valle de los Sarrios, Ibon de Estanes lakua eta Bisaurín mendiaren jabetzak lotzen dituen esekitako bailara txiki bezain liruragarria. Bide hau mendizaletasuna sortzen duen horietakoa dugu, zalantza izpirik gabe.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Aguas Tuertas-Estanés

AGUAS TUERTAS BAILARAREKIN MIRESTUTA

Aguas Tuertas bailararen atarian kokatzen den aterpetik abiatzen gara, ageriko bidetik HE norabidean.

Jarraitzen dugun norabidean begira, bideak lautadaren eskuin aldea ixten duen magaletik doa, metro batzuk gorago. Posizio honetan, laua bera zein honakoa zeharkatzen duen errekaren meandro gorrixkak ezin hobeto ikusteko moduan gaude, bailaran murgiltzen garen heinean. Erreferentzia moduan, lauaren ezker aldean kokatzen den Acué mendia eta bailara bera ixten duen mendilerroko Cúpula de Secús mendiak hartzen ditugu, bien artean dagoen pasabidera joan behar dugu eta, Ibon de Estanés lakura iristeko.

Hasi eta metro gutxira, lautik bidera hedatzen den arroka handi baten ondoan, ur-isuri bat dago eskuin aldean, iturria bailitzan, urontziak betetzeko aproposa.

Blokeak atzean uzten ditugu eta lauaren alde batetik jarraitzen dugu, larreari minik eragin gabe eta bide batez, bertan dauden animaliak lasai utziz. Lautadaren bukaeran dagoen ubidera iritsi aurretik, La Roya ingurutik jaisten diren errekek sortutako sakonuneak ekiditeko, bidea larrean sartzen da bete-betean.

Ibilguen beste aldera egin eta ekialderantz jotzen dugu, Acué mendiaren hego mazelaren oinarrirantz abiatuz, Puerto de Escalé lepoa bertan da eta. Ubideari jarraituz, belarretatik jarraitzen dugu bidearen arrasto ahulei jarraika, Puntal de Secús mendiaren oinaren albotik.

Lepora gerturatu ahala, bideak ere gorantz egiten du eta bidea berriro argi agertzen zaigu begien aurrean. HHE norabidean bira xume bat egin ondoren, lepora iristen gara.

Gunean dagoen lau txiki baten ondotik igaroi, eta seinale tantaiaren eskuin aldera kokatzen den erlaitz belartsu batetik gorantz abiatzen gara, eskuin aldeko muinoa inguratuz. Bidea berriro nabarmendu egiten da eta gutxinaka Las Cabretas inguruan dagoen ekialderanzko bira handira gerturatzen gara.

Hurrengo lepoaren aurretik dagoen lau txikia inguratu eta Cúpula de Secus aurrean dugula, aldapa igotzen hasten gara, hegoalderantz. HHM norabidean, harkaitzen eremuan bira txiki bat egiten dugu eta ezker aldeko muinoa inguratzen dugu, honen atzetik, goialdean dagoen lepora iritsiz, ekialderanzko azkeneko bira bat egin ondoren. Bertan dugu Ibón de Estanés lakurako sarbidea.

Estanés-Valle de los Sarrios

IKUSPEGI EDERREKO LAKUA

Jaitsiera ekialderantz hasten dugu, lakuaren mendebaldeko mugara gerturatzen gaituen bidetik. Bidegurutzean, lakurantz jo beharrean, eskuin aldera jotzen dugu, lakuaren mendebaldeko mugaren paralelotik doan bidetik, Cúpula se Secús mendiaren IE-ko isurialdeko hegaletik, HHE norabidean.

Beheranzko joerari eutsiz, arroken artean pare bat bira egin ostean, lakuaren eremutik aldentzen gaituen bira handi bat egiten dugu, gure urratsak La Trinchera azpian kokatzen den pasabiderantz bideratuz.

Bertan, hegoalderantz egiten dugu, La Trinchera eta Laderas de Cantal hegien arteko irekigunea bilatu nahian.

Ehun metroko maila duen malda gogorretik gora egiten dugu, lur eta arrokaz osaturiko mendi-bide mistoa medio, Valle de los Sarrios bailararen atarian dagoen atakara iritsi arte, sigi-saga.

Valle de los Sarrios-Lizara

ESEKITAKO BAILARA LILURAGARRIA

Ubidearen ondotik jarraitzen dugu bailara ixten duen hormetara gerturatzen garen heinean, eskuin alderanzko joera mantenduz, HM norabidean. Lauaren bukaeran dagoen ubide txiki bat igaro eta Bernerako hormetarantz igotzen hasten gara.

Erreka ezker aldean dugula, mendebalderantz bira egiten dugu bailararen irekiunerantz, aldaparen bukaeran Puerto de Bernera gainara iritsiz.

Bisaurín mendia aurrez-aurre dugula, gainaren beste alderantz jaisten hasten gara. Honakoan, Cúpula de Secús eta Puntal de Secús mendiaen aurkako isurialdeak ikusgai ditugu eskuin aldetik, mendilerroari itzulia egin diogu eta.

Minutu gutxitan, Barranco de Castillones sakanaren oinean dagoen Plana Mistresa laura iristen gara. Bertan, Bisaurín mendiaren ipar hormetako bideaz gain, badira beste zenbait igoera interesgarrien abiapuntu.

Ubidearen irteera guneari jarraituz, HHM norabiderantz jotzen dugu, Bisaurin aurretik dagoen Alto de Fetás eta Bozo de Bernera mendien artetik. Blokeen ondoren, Caseta de Los Forestales edo Caseta de Bernera etxolaren ondotik igarotzen gara.

Eskuin aldetik amiltzen den hartxingadira gerturatu ahala, ingurunea estutu eta malda areagotuz doa. Harrien gainean gaudela, bideak Fetás mendiaren hormen azpiko magaletik nola zeharkatzen duen argi ikus dezakegu.

Errekaren mailara iritsi aurretik, bideak berriro gorantz egiten du, Fetás eta Lizarako lauen artean kokatzen den terrazara iristeko. Mendebalderantz jotzen dugu eta HM norabiderantz jaitsi aurretik, Refugio de Oldecua aterpearen ondotik igarotzen gara.

Epe laburrean, Refugio de Liaza aterpearen gainetik dagoen zuhaiztira iristen gara. Norabideari eutsiz hau gurutzatu egiten dugu, Fuenfríara doan pistan bukatu arte. Pistan, ezker aldera egiten dugu, hego norabidean, eta bidea jarraitzen dugu berriro ere pistak gorantz egin arte, eskuinera doan bihurgune baten ondoren.

Bihurgunearen erpinean pistatik irteten gara, ezker aldetik, Refugio de Lizara aterpera iritsiz.