GR11 03 etapa: Elizondo Urkiaga (Bagorditik). 360º eta EBn

GR 11 Transpirenaika ibilbidearen Elizondo-Urkiaga, Bagordiko askaldegtik abiatuta. Gune hau, Elizondora iritsi aurretik gaua emateko aproposa da, eremu lau, mahai eta ura dauzka eta. Aproposa batez ere, Elizondon lotarako aukerariki ez badago, edota zure kasa ibili nahi baduzu. Honako etapa, aurrekoa baino lasaiagoa bada ere, kontuan hartu behar da Elizondora jaisteko ia 4 km egin behar direla, hortaz, gida ofizialetan agertzen diren datuei gehitu beharko diogun distantzia da.

Oro har, bidearen seinaleztapena ona da, eta gune gorenetako pasarteak gozatu egiten dira, alde batetik inguruko basoen ikuspegia dela eta eta bestetik, larre garaietako mendi-bideen erosotasunaga dela eta.

INFORMAZIO BALIOGARRIA

meteoblue

ELUR-BULETINA

TRACK-A DESKARGATU

NOLA IRITSI

ZAILTASUNA ETA ARRISKU MAILA

Método de Información de Excursiones (MIDE)

MIDE metodoa, mendiko ibilbideen zailtasun- eta arrisku-maila baloratzeko metodo bat da, eta Federación de Deportes de Montaña y Escalada-k (FEDME) gomendatutakoa dugu honakoa, beste federazio batzuen artean. Istripuen prebentzioa du helburu, ibilbideen eskakizun tekniko eta fisikoaren irizpideak bateratuz. Horrela, horien sailkapen objektiboagoa lortzen da.

Informazio-koadro bakoitzak bi zutabe ditu: ezkerrekoak ibilbidearen erreferentziazko informazioa du, hala nola ordutegia, desnibelak, distantzia, etab. Bestalde, eskuineko zutabean ibilbidearen zailtasunaren hainbat alderdiri buruzko informazioa agertzen da. Balioespen-eskala 1etik 5era neurtzen da (txikienetik handienera).

Metodo horrek oinarrizko informazioa ematen du ingurune aldakor batean; beraz, kontuan izan behar dugu lurraren baldintzak nabarmen alda daitezkeela. Horregatik, abiatu aurretik ibilbidearen egoera kontsultatzea gomendatzen da beti.

IBILBIDEAREN DIAGRAMA

IBILBIDEAREN TRACK-A AZTERTU EZAZU

Diagrama track-arekin sinkronizatzen da, desnibelek ibilbidean zehar izan duten bilakaera aztertzeko.
Aukeratu track-eko edozein puntu mapan, eta diagraman proiektatuta ikusi ahal izango duzu.
Egin klik erreferentzia-puntuen gainean, horiek ezagutzeko eta kanpoko mapa batean kokatzeko.

IBILBIDEAREN DESKRIBAPENA

Bagordi - Elizondo

ELIZONDORA JAISTEN

Eguna Bagordin hasten dugu (Maistruzar) iturriaren ondoko errepidetik behera eginez. Errepideak Elizondora eramaten badu ere, GR ibilbideak errepidearen sigi-sagen arteko lasterbideak baliatzen ditu baso artetik aurrera egiteko.

Lasterbide batzuen ondoren, errepidea gure eskuin aldean utzita, mendebalderantz jotzen duen pista bat hartzen dugu beheranzko bidean jarraitzeko. Bideak hegoalderantz bira egiten du borda baten aurrean kokatu arte. Bertan, bizkarretik behera egiten dugu, pistatik aldendu gabe, norabide berean. Pista estutuz doa, haritz handi batzuen artean, mendi-bide bilakatuz.

Bideak, zeta handi bat marrazten du, bigarren borda batera iritsiz. Metro batzuk beherago, maldak gorantz egiten du, bideak aurretik galdutako erosotasuna berreskuratuz. Punturik gorenean, bertan dagoen bidegurutzean, eskuin aldetik jaisten den bidea hartzen dugu, HE norabidea jarraituz baserri bat topatu arte. Atariko bidea gurutzatu eta ageriko bidetik jarraitzen dugu, baserri batzuk tarteko, errepide nagusiaren ondotik igarotzen den pistara iritsi arte.

Pistan gaudela, ezkerretara egiten dugu, ekialderantz, errepidera iritsi arte. Zubiaren azpitik igaro eta HE norabidean jarraitzen dugu kalean behera. Polizia-etxearen aurrean dagoen bidegurutzean, ezkerretara jo eta herrirantz jarraitzen dugu (H).

Menditurri kalea bukatzerakoan, norabideari eutsiz, galtzada-harrizko zoladura duen kalean barneratzen gara. Bira bat egin eta kale nagusira gerturatzen gaituen zubi bat igarotzen dugu. Kale nagusian, ezkerretara egiten dugu. Metro gutxiren buruan, elizaren ondoko kalean sartzen gara, eskuin aldera eginez HE norabidean. Eliza ezkerraldean uzten dugula, aurrera egiten dugu, Elizondotik irtetzeko asmoarekin.

Elizondo - Argibel

PISTEN BIDEGURUTZEAK

Herritik irteten gara, asfaltatutako bidetik gora eginez HE norabidean. Guneko azkeneko baserriaren ondotik, eskuin aldera harresiaren ondotik abiatzen den pistan sartzen gara, errepidetik aldenduz.

150 metrotara, eskuin aldetik gorantz egiten duen bidea hartzen dugu. Malda areagotu egiten da, zuhaiztiaren goialdera iritsi arte, hegoalderantz. Bertan dagoen bidegurutzean, aurrera jarraitzen dugu, norabidea mantenduz. Sigi-saga tankerako bira bat egin ostean, bideak beheranzko joera hartzen du, eskuin aldean borda bat utzi ondoren, errepidea hartu arte.

Kaletik metro gutxi batzuk egin eta eskuin aldetik agertzen den ageriko bide belartsu batean murgiltzen gara. Belardiak, ohiko norabidean metro gutxi batzuk atzera egiten ditu errepidetik urruntzeko, baina laster batean bere onera bueltatzen da, iratze eta sasi artean, HM norabidea hartuz. Bide honen bukaeran, pista bat aurkitzen da, perpendikularki. Iritsitakoan, ezker aldera egiten dugu (E) eta metro gutxiren buruan, eskuin aldetik abiatzen den beste pista batetik jarraitzen dugu, H norabidean. Pista honetan 350m egin ondoren, eskuin aldera jotzen duen adar batetik agin behar dugu bideari jarraitzeko. Adar hau, ezkerretara jotzen duen bihurgune baten ondoren kokatuta dago. Bide hau, hasiera batean errei moduan agertzen da, baino metroak irabazi ahala, estutzen joaten da eta hurrengo eraikinak ezkerretara ikusten ditugunerako, jada mendi-bide bihurtu zaigu (HE).

Norabidea mantentzen dugu, bidegurutze bat aurrean izan arte. Ezker aldean, pista nagusia kokatzen da, metalezko ate baten atzetik. Aurrean, eskuin aldeko bidera sarbidea ematen duen metalezko pasabide bat dugu. Hau igaro, eta bidean barneratzen gara. Aurrera egiten dugun heinean, hegoalderanzko joera mantenduz, malda areagotuz doa. Argi-zurtoin baten ondoan, hurrengo bidegurutzea topatzen dugu. Honakoan ere, errepidea gurutzatu eta aurrera egiten dugu ageriko bidetik, hegoalderantz. Hasieran, bidea aire zabalean hasten bada ere, adar baxuko zuhaizti gazte batean sartzen gaitu, sasi eta iratze artean. Pasarte estu hau igaro eta berriro ere bakea dugu bidean, ohiko erosotasuna berreskuratuz.

BASO ARTEAN

Basegiko zuhaiztira iritsi eta mendebaldeko mugatik doan bidea baliatuz, inguraketa hasten gara, maldak gorantz egiten duelarik. Pista nagusian eskuinera jo eta gorantz egiten jarraitzen dugu, mendebalderantz. Metro gutxitara, ezkerrera dagoen bidexka hartzen dugu, hurrengo pistan barneratu arte malda areagotuz. Pista berriak, hegoalderantz jotzen du, zuhaiztitik aldenduz. Gutxira, zuhaizti berri baten aurrean kokatzen gara eta pistatik at goaz, eskuin aldetik aurrera jarraitzen duen bide bat hartuz, HE norabidean, eskuin aldera dugun zuhaiztiaren mugatik. Pinudia atzean utzi eta pagoa nagusi den eremuan aurrera jarraitzen dugu, Bagame eta Basegiko basoak elkartzen diren gunetik, ekialderantz.

Bideak berriro gorantz egiten du, Larrabeltz eta Alba mendien arteko lepoaren inguruan zuhaiztia utziz. Eskuin aldean kokatzen den aterpe baten ondotik igarotzen gara, eta leporantz jarraitzen dugu, bertan dagoen ehiza postu baten ondoko bidea hartzeko. Bide hau, Alba mendia inguratuz, Argibelgo leporantz igoarazten gaitu.

Argibel - Argintzu

MENDIKATEEN ARTETIK

Lepoaren gaineko informazio zurtoinean, hegoalderantz jotzen dugu goranzko bidean, Argibel atzean dugularik. Hesiaren ondotik HE norabidean jarraitzen dugu bidearen punturik gorenera iritsi arte. Orain arte bezala, hesiaren ondotik jarraitzen dugu, oraingoan beherantz, hegoalderantz.

Gandorretik jaisten jarraitzen dugu zuhaitzen itzaletan sartu arte, norabidea mantenduz. Laster batean, Azaldegi mendiaren muinotik igarotzen gara konturatu gabe, igoera txiki baten ondoren eta berriro ere metro batzuk galtzen ditugu pista berri batetaraino.

Pistatik metro batzuk egin, eta kanadiar erako pasabide baten eskuin aldetik gorantz abiatzen den bidea hartzen dugu, mendebalde alderako joera duen bira luze bat eginez. Bira bukatu ahala, borda batekin topo egiten dugu. Bertatik, eskuin alderantz doan bidean barrena egiten dugu beste goranzko bira bat eginez, oraingoan iparralderantz.

Biraren punturik gorenean beste bidegurutze bat topatzen dugu. Zentzua erabat aldatzen dugu, MHM norabidean. Pagadi batean murgiltzen gara, HM norabidearen joera mantenduz.

Mendebalderantz bideratu ondoren, soilgune batetan kokatzen den bidegurutzean, HM norabidean jarraitzen dugu, zuhaitzen ondotik malda gogor bati ekinez, Lohiluze mendiaren azken muinoaren ondoan kokatu arte, Argintzu atzean duela. Maldak lasaitu bat ematen digu eta bi mendien arteko leporantz jotzen dugu.

Argintzu - Urkiaga

URKIAGARA JAISTEN

Hesia pasabidetik igaro eta honen ondotik, Argintzu mendiaren magala zeharkatzen duen bidea hartzen dugu.

Gailurraren bertikalaren azpian, harkaitzak hasten diren gunean, bideak HM norabidea hasten du. Pasarte honetan, bidea tarteka galdu egiten da, baina norabidea mantenduz emeki igotzen garen neurrian, erreferentzia moduan erabili dezakegun ehiza postua aurrez aurre ikusten dugu. Postuaren ondotik igaro eta bideak Lohilurzeko leporantz jaisten da, Argintzu eta Iparraldeko Kaxkoaren artean hain zuzen.

Azken honen tontorrarren azpitik doan bidea hartzen dugu, mendikatearen hurrengo lepora iristeko, bertan, hartu beharreko norabidea adierazten duen informazio-zurtoin bat kokatzen da. Hegoalderantz doan bidea hartzen dugu, eta garaierarik galdu gabe, Artsalgo Gainaren mazela zeharkatzen dugu, iratze artean.

Minutu gutxiren buruan, Enekorriko Lepora iristen gara, Laztegiko gainaren ondoan. Zurtoinera iritsi bezain laster, EIE norabidean jarraitzen dugu, oraingoan nabarmenki beherantz, Kasetako Oihanaren zuhaiztiaren ondora.

300 bat metro beherago, borda baten ondotik igarotzen gara, HE norabidea jarraitzen duen bidetik, pagadirantz. Bideak, norabidea mantentzen du, baina eroritako hosto kopuruen arabera, baliteke ez oso agerikoa izatea, hortaz, zuhaitzen enborretako aztarna txuri-gorriekin adi ibili behar dugu.

Bordatik kilometro bat pasatxo, bidea mendi-bide bihurtuta jada eta soilgune baten atarian, zurtoindun bidegurutze bat topatzen dugu. Beheranzko bidetik jarraituz, berriro basoan sartzen gara, baina oraingoan bai, Urkiagako gainera iritsi bitarteko bidea, oso agerikoa dugu.